Rayon qeydiyyatında olan maşınların paytaxta buraxılmaması sadəcə regionlarda yox, uzun illər Bakıda yaşasa da, nəqliyyat vasitəsi rayon qeydiyyatında olan vətəndaşların da narazılığına səbəb olub.
“Qafqazinfo” xəbər verir ki, paytaxt sakinlərindən biri bu məsələ ilə bağlı redaksiyamıza maraqlı sual ünvanlayıb: “Mən 9 ildən çoxdur ki, Bakıda yaşayıram.Binəqədi rayonunda öz adıma 2 otaqlı evim var və burada işləyirəm. Amma özüm rayon qeydiyyatındayam. Şəxsi maşınım da başqa bir şəhərdə -Mingəçevirdə qeydiyyatdadır. İndi mən rayona getsəm, öz maşınımla Bakıya qayıda bilmərəm?”
Məsələ ilə əlaqədar olaraq Baş Dövlət Yol Polis İdarəsinin İctimaiyyətlə Əlaqələr Şöbəsinin rəisi Kamran Əliyevlə əlaqə saxladıq. DYP rəsmisi bildirdi ki, sahibinin harada yaşamasından asılı olmayaraq bu qərar rayon qeydiyyatında olan bütün nəqliyyat vasitələrinə şamil olunur: “Rayon qeydiyyatında olan nəqliyyat vasitələrinin şəhərə girişinə qadağa qoyulub. Sözsüz ki, həmin şəxs üçün də bu qadağa tədbiq olunur və nəqliyyatla Bakı şəhərinə girişinə məhdudiyyət qoyulacaq. Yəni, hələlik bu qərar qeyri-Bakı qeydiyyatında olan bütün nəqliyyat vasitələrinin hərəkətinə məhdudiyyətin tədbiq edilməsidir. Əgər şəxs paytaxt ərazisində pasport qeydiyyatına düşəcəksə, avtomobilini öz adına rəsmiləşdirib Bakı nömrəsi alacaqsa, əlbəttə ki, onun şəhərə girişinə heç bir problem ola bilməz”.
Son şərhlər