Separatçı ölkədə o qədər genişmiqyaslı həbslər həyata keçirilir ki, hətta insanları qonşu şəhərlərin həbsxanalarında yerləşdirirlər
Ermənistanın paytaxtı İrəvanda elektrik enerjisinin qiymətinin artırılmasına qarşı keçirilən etiraz aksiyaları hələ də davam edir. Məlumata görə, nümayişçilər Barqamyan prospektini tərk etməkdən imtina edirlər. Erməni polisi paytaxt İrəvanın mərkəzində etirazçıların barrikada kimi istifadə etdiyi zibil qutularını ərazidən yığışdırmağa çalışır. Lakin hüquq-mühafizə orqanları əməkdaşları zibil konteynerlərini etirazçılardan ala bilmirlər. Etirazçılar zibil qutularının üzərinə çıxaraq onları polislərə təhvil vermək imtina edirlər. Ötən gecə Barqamyan prospektində etirazçılarla hüquq mühafizə orqanları əməkdaşları arasında insidentlər yaşanıb. Artıq bu etiraz aksiyasına Ermənistanın bir çox şəhər və kəndləri də qoşulub. Hazırda aksiyaların keçirildiyi Baqramyan prospektinə əlavə təhlükəsizlik qüvvələri cəlb olunub. Polislər dəyənək və alüminium qalxanlarla silahlanıblar. Məlumat üçün bildirək ki, iyunun 22-i axşam saatlarından etibarən İrəvanda minlərlə sakin Serj Sarkisyanın iqamətgahı yerləşən Baqramyan prospektini bağlayıblar.
Aksiyaları şərh edən siyasi elmlər doktoru, politoloq Elman Nəsirli AİM.az-a söyləyib ki, işğalçı ölkədə xalqın etiraz dalğasının polis tərəfindən dağıdılması, qeyri-adekvat güc tətbiq edilməsi bir daha onu göstərdi ki, Sarkisyan rejimi öz hakimiyyətini qorumaq üçün yalnız gücə arxalanır:
“Sarkisyanın sosial dayaqları tamamilə sıradan çıxıb. Belə olan təqdirdə, sual ortaya çıxır: Azərbaycanı hədəf seçən dövlətlər, xüsusilə, I Avropa Oyunları ərəfəsində və gedişində ölkəmizə qarşı təzyiq dilində danışan dövlətlər, görəsən, arxasında Sarkisyan və onun kamandasının dayandığı bu polis zorakılığına necə reaksiya verəcək, ölkədə insan hüquqlarının pozulması ilə bağlı bu rejimə təzyiqlər göstərəcəkmi? Təbii ki, şübhəlidir. Çünki Ermənistana havadarlıq edən dövlətlər bunu istəmirlər. Ən azı əlaltıları olan Ermənistanı çıxılmaz vəzyyətdə qoymamaq üçün. Bildiyiniz kimi, 2008-ci ildə də Sarkisyan hakimiyyəti zəbt edərkən xalqın etirazını zorla, gülləbaranla yatırtdı. Eynən indikinə oxşar hadisələr baş verməkdədir”.
E.Nəsirlinin sözlərinə görə, separatçı ölkədə o qədər genişmiqyaslı həbslər həyata keçirilir ki, ölkə paytaxtındakı həbsxanalarda yer qalmayıb:
“Hətta insanları qonşu şəhərlərin həbsxanalarında yerləşdirirlər. Bu da rüsvayçı bir haldır ki, məhz Ermənistanda baş verməkdədir. Ümumiyyətlə, Ermənistan hakimiyyəti daxili auiditoruyanı sakitləşdirmək üçün diqqəti xarici məsələlərə, xüsusilə, Dağlıq Qarabağ münaqişəsinə yönəldir. Amma bütün hallarda rejim çökür”.
Politoloqun qənaətincə, aksiyalar olduğu kimi davam edərsə, bu, Sarkisyan hakimiyyətinin sonuna gətirib çıxara bilər:
“İşğalçı ölkənin vəziyyəti həqiqətən də çox ağırdır. Ermənistan əhalisinin kütləvi şəkildə ölkəni tərk etməsinin əsas səbəbi də məhz vəziyyətin son dərəcə kritik olmasıdır”.
Son şərhlər