Bu gəncin oğurluqları saymaqla bitmir
Paytaxtın Xəzər rayonunda silsilə oğurluqlar törətmiş gənc, polis tərəfindən tutularaq istintaqa təhvil verilib.
Xəzər Rayon Polis İdarəsinin Cinayət Axtarış Şöbəsi və 2-ci Polis Bölməsi əməkdaşlarının keçirdikləri əməliyyat-axtarış tədbirləri nəticəsində, aprelin 27-də Bəxtiyar Sultanovun evindən pəncərənin dəmir barmaqlığını sındırmaqla, dörd manat pulu oğurlamaqda şübhəli bilinən Şamaxı rayon sakini, 23 yaşlı Asəf Feyzullayev tutulub. Aparılmış araşdırmalar zamanı məlum olub ki, Asəf Feyzullayev yanvarın 16-da Bakının Buzovna qəsəbəsi Albalılıq yaşayış sahəsində Vüsal Hacıyevə məxsus yarımtikilidən inşaat materialları, martın 13-də Rafael Cəfərovun evindən qapını sındırmaqla, 950 manat pul və 8000 manat dəyərində qızıl-zinət əşyaları, martın 21-də Şamin Dostməmmədovun evindən pəncərəni açmaqla 3000 manat və qızıl-zinət əşyaları, aprelin 20-də həmin yaşayış sahəsində yaşayan Cavid Gəncəlinin evindən pəncərənin barmaqlıqlarını sındıraraq, noutbuk və monitor, aprelin 22-də Saleh Hüseynovun bağ evindən pəncərənin dəmir barmaqlıqlarını sındırmaqla, bir ədəd köynək oğurlayıb.
Saxlanılan şəxsin ətrafında aparılmış araşdırmalar nəticəsində müəyyən edilib ki, o, həmçinin yanvarın 18-də Binə qəsəbəsi, Atçılıq yaşayış sahəsində yaşayanların – Etibar Zəkiyevin evindən 1850 manat pul və qızıl-zinət əşyaları, martın 25-də Kəmalə Seyidovanın evindən 1000 manat pul və qızıl-zinət əşyaları, martın 29-da Telli Ərəbovanın evindən 100 manat pul və qızıl-zinət əşyaları, aprelin 4-də Ramil Kərəm oğlu Məmmədovun evindən 1800 manat pul və qızıl-zinət əşyaları, aprelin 11-də İlqar İbrahimovun evindən 1000 manat və qızıl-zinət əşyaları, aprelin 12-də Elman Qasımovun evindən 2500 manat pul və qızıl-zinət əşyaları, aprelin 17-də isə Yunis Əliyevin evindən qızıl-zinət əşyalarını gizli yolla götürüb.
Bundan başqa, Asəf Feyzullayev martın 18-də Fəxriyyə Əliyevanın bağ evindən plastik pəncərəni sındırmaqla süfrə, aprelin 10-14-də Bakı şəhər sakini Sahilə Kəngərlinin Buzovna qəsəbəsində yerləşən bağ evindən 1500 ABŞ dolları və 500 manat pul oğurlayıb.
Asəf Feyzullayev – saxlanılan şəxs: “Yaşayış olmayan, işıq yanmayan evlərə girirdim. Günortadan sonra, axşamçağı pəncərədən girirdim evlərə”.
Faktla bağlı Xəzər RPİ-də cinayət işi açılıb, araşdırma aparılır. (Region TV)
Son şərhlər