İsveçdə Azərbaycan Birliyi bu ölkədəki soydaşlarımıza müraciət ünvanladı

Müraciətdə deyilir: “Əziz dostlar, dəyərli həmvətənlər! Bilirsiniz ki, qarşıda 28 may – Şərqdə ilk Respublika-Cümhuriyyət quran dəyərli xalqımızın böyük bayramı gəlir. Bu bayramı cümhuriyyətimizə, dövlətimizə layiq böyük el şənliyinə çevirmək fikrindəyik. Bunun üçün Azərbaycandan çox populyar müğənni Samir Piriyevi, Almaniyadan instrumental ansambl və ulu əcdadlarımızın bizə miras qoyduğu, mədəniyyətimizin incisi “Muğam” sənətkarları, ikinci muğam müsabiqəsinin laureatı Könül Məmmədlinin ifaçılığı ilə muğam üçlüyünü dəvət etmişik. Bu dəfə daha geniş salon kirayə edib Azərbaycan mətbəxinin incilərini təqdim etmək fikrindəyik. Bütün bunlar böyüklər üçün cəmi 400 kr (təxminən 40 avro). 12-06 yaşlı uşaqlar üçün 200 kr (20 avro). kiçik yaşlı balalar üçün isə pulsuzdur. Əgər sponsorumuz olsaydı bütün bunlar daha aşağı qiymətə, bəlkə də pulsuz olardı. Amma pulsuz tədbirlərin də bir narahatçılığı ondadır ki, istər-istəməz ora insanları dəvətnamə ilə çağırilmalı olacaqdıq. Bunun da ayrı-seçkilik kimi qəbul olunacağı və haqlı  olaraq narazılığa səbəb olacağı indidən məlumdur. Simvolik qiymətlər də ola bilər. Amma yenə də qeyd etmək istərdik ki,  bu tədbir bizlərin qatqısıyla heç bir gəlir qazanmaq düşünmədən yalnız  “Birliyimiz  və diriliyimiz” prinsipi ilə edilir.

Əziz soydaşlar, İsveç ilin 6 ayı gecə, 6 ayı gündüz olan sakit və bahalı ölkədir. Təbii ki, hər kəsin həftə sonları isveçlilər kimi barlarda və restoranlarda  “stress atmaq” imkanı yoxdur. Buna heç bizim mədəniyyətimiz, kültürümüz də imkan vermir. İldə cəmi üç əsas bayramımız var ki, heç olmasa, bu bayram günlərində bir araya gələ bilək; Yeni il və Həmrəylik günü, Novruz Bayramı  və 28 mayda.. İsveçdə iki federasiya və onlarla Azərbaycan dərnəkləri var. Bəlkə elə bir şəhər, elə bir insan adı yoxdur ki, onların adına 3-5 nəfər ailə üzvlərindən ibarət dərnək, təşkilat olmasın. Amma çox acınacaqlı haldır ki, hələ də ümummilli məsələlərdə birləşə, sözü bir yerə qoya bilmirik.

Elə Türkiyə səfirliyinin önündəki son nümayiş də buna misal ola bilər. Təəssüf ki, bir qismimiz şənliklərimizi belə hansısa şəxsi münasibətlərə, təşkilatçının  kimliyinə görə boykot edirik. Yəni doğrudan evdə oturub, depressiyaya qapılmaq insan arasına çıxmaqdan yaxşıdır? Ən üzücü hal bilirsiniz nədir? Ambisiyalarının əsiri olaraq, kiçik kafelərdə, pizzeriyalarda, pablarda eyni adlı tədbirlər qoyub vətəndaşları incitmək, pərən-pərən salmaq və böyük tədbirə süni əngəllər yaradaraq insanlar arasında çaşqınlıq salmaq. Günah deyilmi, dostlar?! Axı bu düşmənçilikdən də betərdir. Axı bu nə Azərbaycanlığa, nə vətənpərvərliyə, nə müqəddəs dəyərlərə, nə də insanlığa sığır. İnanın, heç kəsə çamur atmaq, heç kəsi aşağılayıb gözdən salmaq niyyətimiz yoxdur. Biz sadəcə böyük xalq olduğumuzu sübut edərək adımıza layıq təntənəli tədbirlər keçirmək istəyirik.