Asəf Quliyev
Salam, Albert.
Bilirəm, latın qrafikası ilə oxumaq sənə çətin olacaq, amma əminəm ki, məni yaxşı başa düşəcəksən. Həm də artıq öyrənmək lazımdır.
Facebook səhifəndə paylaşdığın fotolardan belə başa düşürəm ki, pis deyilsən. Mən də pis deyiləm. Amma bundan daha yaxşı ola bilərdi hər şey. Sənin üçün də, sənin soydaşların üçün də, mənim üçün də, mənim soydaşlarım üçün də. Bu lənətə gəlmiş müharibə olmasaydı.
Dünən Facebook səhifəndə Qarabağdakı ofisinizin həyətində çəkdiyin tülpan fotolarını paylaşmışdın. Mənə çox maraqlı gəldi.
Təbiət cənnət Qarabağa çox gül-çiçək bəxş edib. Laləsi, nərgizi, bənövşəsi olub Qarabağın. Amma tülpan yox. Tülpan Qarabağa gəlmədir. Avropadan gətirilib. Tülpan gözəl görünə bilər. Amma təbiətin Qarabağa bəxş etdiyi güllərlə müqayisədə çox bəsitdir. Əminəm ki, sən özün də təbiətin Qarabağa bəxş etdiklərini daha gözəl, daha mükəmməl hesab edirsən. Avropadan, Amerikadan, Rusiyadan gələnlər və gətirilənlər Qarabağa gözəl gələcək vəd etmir. Əminəm ki, bunu sən də bilirsən. Elə isə Avropadan, Amerikadan, Rusiyadan gələnlərə və gətirilənlərə çox da bel bağlama.
Gül demişkən… Şuşada bir Gülü bağ vardı. Amma deyəsən indi yoxdu. Çox gözəl idi. Çünki təbii idi. Çünki Qarabağın idi…
Gül dedim… Razmik Petrosyanı tanıyırsan. Ona salam söylə. Yəqin fikirləşirsən ki, gül söhbəti hara, Razmik Petrosyan hara. Vitali Balasanyan demişdi ki, Razmik Petrosyan Azərbaycanın Milli Qəhrəmanı Allahverdi Bağırovun məzarına gül aparır hərdən. Təbii Qarabağ gülləri. Baş verənlərə rəğmən onun köhnə dostluğa sadiq qalması hörmətə layiqdi. Dostluğa bu sədaqət də Avropadan, Amerikadan, Rusiyadan gəlməyib. Yəqin ki, bunu da bilirsən.
Sənin çəkdiyin tülpan fotolarını gördüm də yadıma düşən “Xarı bülbül” oldu. “Xarı bülbül” güldür. Təbiətin Qarabağa bəxş etdiyi gül. Adətən Cıdır düzünün quzeyində bitərdi. Deyilənə görə, dünyanın heç yerində bitmir. Hər halda onun haradasa bitdiyini sübut edən heç bir məlumata rast gəlməmişəm. Bu yaxınlarda Qax rayonunda görünüb. Vəssalam.
Bir xahişim var. Cıdır düzündə bitən “Xarı bülbül”ü tap, onun da şəklini çək. Tapa bilsən…
Tapa bilməsən çox axtarma. Demək ki, yoxdur. Amma vaxtı çatanda o da qayıdacaq. “Qafqazinfo”
Son şərhlər