“Məhsul”a soğan doğradılar…

Milli Şuranın mitinqinə getməz olaydım. Doğrusu, bu günədək vaxt məhdudluğundan heç vax “Məhsul” stadionuna təşrif buyura bilməmişdim. Amma nədənsə dünən “Hürriyyət” qəzetinin baş redaktoru Heydər Oğuz belə deyək ki, saqqızımı oğurladı və onunla mitinqə baxmağa getdik. Elə bir-iki şəkil çəkdirmişdik ki, AXCP sədri Əli Kərimli “bismillah” edib çıxışına başlayar-başlamaz oranı tərk etməli olduq. “Hürriyyət” qəzetinin qonağı gəlmişdi və onunla söhbəti iptal edə bilməzdik…

Xülasə, “Hürriyyət”ə qayıtdıq. Amma bir qədər sonra mənə dostlardan zəng vurub soruşanda ki, deyəsən ayağın “məhsul”lu olub, aksiya iştirakçılarına kartof-soğan paylayıblar, əvvəl inanmadım. Dedilər bəs bilmirsənmi, “Məhsul” stadionuna bitişik göydələndəki eyvanlardan mitinq iştirakçılarına kartof-soğan atıblar. Niyəsini soruşmağın yeri yox idi. Amma dərhal da düşündüm ki, çox yersiz və qaş düzəltdikləri yerdə göz çıxarılan yanlış bir addım atıblar. Çünki müxalifətin növbəti mitinqinə əlində zənbil minlərlə insan toplaşacaq ki, kartof-soğandan onlara da pay düşsün. Yaxud Milli Şura göydəndüşmə fürsət qazanmış oldu ki, mitinqdə insanlara kartof-soğan paylanılması haqqında ictimai rəydə fikir formalaşdırsınlar. Kim ki, bunun effekt verməyəcəyini düşünür, möhkəm yanılır. Çünki bu ölkədə əksəriyyət hələ də Məmmədhəsən əmidən, Fatmanisə qarıdan fərqlənmir və belə sadəlöhv kəsimi aldatmaq çoxmərtəbəli binanın eyvanından aksiya iştirakçılarına kartof-soğan atmaq qədər asan bir işdir.

Hakimiyyət bununla elə zənn etməsin ki, bununla mitinqə gələnləri təhqir edərək ələ salıblar və bundan sonra “Məhsul”a gələnlərin sayında azalma olacaq. Şəxsən mən bunun əksini düşünürəm. Çünki insanların polis kordonundan ora-burasını əlləyərək bir-bir stadiona buraxılmasından şəxsən tanıdığım onlarla stajlı müxalifətçinin ehtiyatlanaraq “Məhsul”a kənardan tamaşa etməsindən təfsilatlı məlumatlıyam. Yeri gəlmişkən, bura o məmləkətdir ki, seçkilərdə məntəqələrdəki müşahidə kameralarından qorxaraq vicdanının səsinə deyil, ona sifariş verilən namizədə səs verən çoxsaylı zavallı seçici var. Ona görə də bu ölkədə insanlarla məzələnmək çox asandır və Milli Şura rəhbərliyinə məsləhət görərdim ki, növbəti mitinqin şüarını “Talana və yalana son” deyil, “Bizə eyvanlardan kartof-soğan atmayın, onları bazardan almağa imkanımız çatan cəmiyyət qurun” olmalıdır.

Başqalarını bilmirəm, şəxsən mənim növbəti mitinqə hökmən qatılmaq həvəsi baş qaldırıb.Mənə kartof-soğan ehtiyac deyil, heç Milli Şuraya da dəstək vermək fikrim yoxdur, sadəcə bu addıma etiraz əlaməti olaraq gedirəm “Məhsul”da məhsuldar açıqlamalara qulaq asmağa…

Amma mitinq iştirakçılarının, təbii ki, əksəriyyət təşkil edən cəbhəçilərin AXCP sədri Əli Kərimlinin stadiona daxil olmasına verdikləri emosional reaksiyaya da ürəyim bulandı. Bununla cəbhəçilər Milli Şuranı aşağıladıqlarının fərqində olmadıqlarını ortaya qoydular. Onlar anlamadılar ki, axı bu mitinq AXCP-nin deyil, Milli Şuranın aksiyasıdır. Burdan belə nəticə çıxdı ki, Milli Şura elə hakimiyyətin iddia etdiyi kimi də AXCP-nin əlindəki oyuncaq qurumdur.Bununla da “Əli bəy, Əli bəy” sədaları ilə bu qurumun siyasi meyitə çevrilməsinə rəvac verdilər. O qışqırtılarsa Milli Şuranın dəfn mərasimindəki ağıya bənzədi…