Teleaparıcı Samirə: “Qadını əvvəlcə sevmək, sonra…” – FOTOSESSİYA

Ailem.az-ın “O…” layihəsinin bu dəfəki qonağı “Azad Azərbaycan” telekanalında yayımlanan “ATV-xəbər” verilişinin aparıcısı Samirə Mustafayevadır.

–     Ailə qurarkən hansı daha vacibdir: sevgi, yoxsa hörmət?

– Hər ikisi.

–     Qızınıza verəcəyiniz məsləhət…

– Ləyaqətli, savadlı və düzgün olsun.

–     Qadına nəyi yaraşdırmırsınız?

– Yalanı və nəfsinə qalib gələ bilməməyi.

–     Bəs kişiyə nələri yaraşdırmırsınız?

– Kişi möhkəm olmalıdır, dayaq olmağı bacarmalıdır. Ona görə darda qoymağı kişilərə yaraşdırmıram.

–     İntrovertsiz, yoxsa ekstrovert?

– Ekstrovert.

–     Məşhur olmaq, yoxsa olmamaq?

– Fərqli məqamlarda fərqli hisslər keçirmişəm. Məşhur və xeyirli olmaq yaxşıdır, ancaq hərdən işi-gücü, övladları, ev işləri olan sıradan bir qadın kimi düşünmək də xoşdur.

–     Müəllimə, yoxsa teleaparıcı?

– Teleaparıcı.

–     Ellen Deceneres, yoxsa Opra Uinfri?

– Qaradərili olduğuna görə Uinfri.

–     İrqçisiniz?

– Qətiyyən. Sadəcə mübariz insanları sevirəm.

–     Qadını sevmək lazımdır, yoxsa anlamaq?

– Əvvəlcə sevmək, sonra anlamaq.

–     Özünüzə ən çox hansı sualı verirsiniz?

– Görəsən, planlarımı reallaşdırmağa ömrüm yetəcək? Gecikmirəm ki? Niyə dəyişə bilmirəm?

–     Cavab tapa bilirsiniz?

– Sonuncuya tapıram. Mən elə bu cür olmağımdan zövq alıram (gülür).

–     Seksual, gözəl, yoxsa intellektual olmaq?

– İntellektual olmaq.

–     Qısa, yoxsa uzun saç?

– İndi uzun saç.

–     Xoşbəxt olmaq üçün nə lazımdır?

– Xoşbəxt edəni tapmaq, mübarizə aparmaq və təəssüf ki, pul qazanmağı da əlavə edirəm bu siyahıya. Pul başqasından asılı olmamaq üçün vacibdir.

–     Xoşbəxtsiniz?

– “Bəxtindən gileyli bəxtəvər qadın” misrası düşür yadıma. Dərindən düşünəndə xoşbəxtəm.

–     Getdiyiniz ən uzaq ölkə?

– Şarm Əl Şeyxə (Misir) hazırlaşıram.

–     Bakıda nəyi sevmirsiniz?

– Sahib olduğumuz gözəlliklərdən zövq ala bilməyib uzaqlara getməyimizi və xaricdə rahatlıqla geydiklərimizi Bakıda xaric üçün saxlamağımızı.

–     Sonuncu oxuduğunuz kitab…

– Təkrarən oxuyuram bu kitabı. Parisula Lampsosun “Səddam Hüseynlə həyatım” əsəri.

–     Ən sevdiyiniz ətir…

– Ətir seçimim bir dənə deyil. Bu gün “Tom Ford Tobacco Vanille” vurursamsa, sabah “Keiko Mecheri Loukhoum” istifadə edirəm.

–     “Kaş başqa işlə məşğul olardım” deyirsiniz heç?

– Heç vaxt deməmişəm. Təsəvvürümə belə gətirmirəm.

–     Ən böyük arzunuz…

1.   Üzüm kimi daxilim də həmişə gülsün;

2.   Qızıma istədiyim şəraiti yaradım ki, gələcəyini  gözəl qursun;

3.   Həyatda yaxşı mənada xeyirli, faydalı iz qoya biləcək ömür yaşayım və öləndən sonra adım təkcə ailəmlə anılmasın.

4.   Anam qocalmasın.