Ukrayna Avropa Birliyinə və NATO-ya daxil ola bilməz, çünki bu, müharibə demək olardı. Qərblə Rusiya arasında “bufer zona” olaraq qalmalıdır.
Elchi.az xəbər verir ki, bu fikri Macarıstanın baş naziri Viktor Orban deyib.
O, xatırladıb ki, Brüssel və Kiyevdə hazırlanan Ukrayna üzrə yol xəritəsində onun 2027-ci ilə qədər Aİ-yə sürətləndirilmiş şəkildə daxil olması nəzərdə tutulur. Aİ-nin növbəti yeddi illik büdcəsi də bunu nəzərə alaraq hazırlanır: “Amma Ukrayna indi Avropa Birliyinə daxil olarsa, Avropada müharibə olacaq, çünki bu, bir Aİ ölkəsinin başqalarının müdaxiləsi olmadan böyük gücə qarşı müharibə apara biləcəyi illüziyasıdır. Ona görə də biz hesab edirik ki, Ukraynanın Aİ-yə daxil olması qəbuledilməzdir”, – hökumət başçısı bildirib.
“Ukraynanın Aİ-yə üzvlüyü müharibəyə və Avropa bazarının məhvinə aparan bir yoldur” deyən Orban, belə bir addımın – bəzi iddiaların əksinə olaraq – Avropa İttifaqı və NATO-nun təhlükəsizliyini gücləndirməyəcək, əksinə zəiflədəcəyini vurğulayıb.
Onun sözlərinə görə, Ukrayna Avropanı Rusiyadan müdafiə edə bilməz. Ukrayna Avropanı gücləndirmir, əksinə müharibəyə çəkir.
O, əvvəllər dəfələrlə bəyan edib ki, Avropa İttifaqı öz təhlükəsizliyini gücləndirməlidir və Ukraynaya Qərblə Rusiya arasında “bufer zona” rolu verilməlidir. Orban hələ də bu fikirdə olduğunu təsdiqləyib.
Yeganə
