Aİ-nin xarici siyasət üzrə ali nümayəndəsi Kaya Kallas Avropa İttifaqının təhlükəsizliyə yanaşmasını təcili dəyişməli olduğunu və öz müdafiəsinə görə daha böyük məsuliyyət götürməsinin vacibliyini bəyan edib.
Elchi.az xəbər verir ki, bu barədə “Bloomberg” məlumat yayıb.
Avropa Müdafiə Agentliyində çıxış edən Kallas bildirib ki, ABŞ prezidenti Donald Trampın NATO öhdəliklərinə yenidən baxılması ilə bağlı dəfələrlə səsləndirdiyi fikirlər və Qrenlandiyaya nəzarəti ələ almaq hədələri fonunda Avropanın ABŞ-ı təhlükəsizlik tərəfdaşı kimi qəbul etməsinə olan inam sarsılıb.
“Tarixdə heç bir böyük güc öz təhlükəsizliyi məsələsində başqalarına arxalanaraq sağ qala bilməyib”, — deyə diplomat vurğulayıb.
Kallas qeyd edib ki, belə vəziyyətdə yalnız öz güclərinə arxalanmaq lazımdır. O, alyans daxilində müstəqilliyi və koordinasiyanı gücləndirmək üçün NATO-nun Avropa üzv ölkələri üçün “Avropa müdafiə qabiliyyəti hədəfləri”nin müəyyənləşdirilməsini təklif edib.
Məryəm
