ABŞ prezidenti Donald Tramp 30 gün ərzində Venesuelada yeni seçkilərin keçirilməyəcəyini bildirib və ölkənin əvvəlcə “sabitləşdirilməsi” lazım olduğunu iddia edib.
Elchi.az xəbər verir ki, NBC News-a verdiyi müsahibədə Tramp, Venesuela prezidenti Nikolas Maduronu saxlayan ABŞ hərbi müdaxiləsindən sonra Vaşinqtonun ölkədəki rolunun uzunmüddətli olacağını bildirib.
Bir ay ərzində Venesuelada seçkilərin keçirilməyəcəyini bildirən Tramp, “Əvvəlcə ölkəni düzəltməliyik. Seçkilər ola bilməz. Xalqın səs verməsi mümkün deyil” deyib.
Tramp seçkilər üçün “bir proses izlənilməli və ölkə sabitləşdirilməlidir” iddiasını irəli sürüb.
O, həmçinin ABŞ-ın Venesuela ilə müharibə vəziyyətində olduğu iddialarını rədd edərək deyib: “Biz narkotik satıcıları ilə mübarizə aparırıq. Biz həbsxanalarını, narkomanlar və ruhi xəstəxanalarını ölkəmizə boşaldanlarla mübarizə aparırıq”. Tramp həmçinin ABŞ-ın Venesuelanın enerji infrastrukturunu yenidən qurmaq üçün neft şirkətlərinin işinə subsidiya verə biləcəyini və layihənin 18 aydan az müddətdə başa çatdırıla biləcəyini bildirib. “Çox böyük məbləğdə pul xərclənməli olacaq. Neft şirkətləri bu pulu xərcləyəcək və sonra biz onları geri ödəyəcəyik, ya da əldə edilən gəlir vasitəsilə geri ödəniləcək”, – deyə Prezident Tramp bildirib.
Rodrigesə qarşı sanksiyalar yenidən nəzərdən keçiriləcək
Tramp, Dövlət Katibi Marko Rubio, Müdafiə Katibi Pete Hegseth, Baş Məsləhətçi Stephen Miller və Vitse-prezident JD Vance-in ABŞ-ın Venesuela prosesindəki roluna nəzarət edənlər arasında olacağını bildirərək, son qərarı özünün verəcəyini vurğulayıb.
Venesuelanın Müvəqqəti Prezidenti Delcy Rodriguezin ABŞ rəsmiləri ilə “əməkdaşlıq etdiyini”, lakin Maduronun həbsindən əvvəl heç bir əlaqə olmadığını iddia edən Tramp, Rodriguezə qarşı sanksiyaların davam etdirilib-etdirilməməsi ilə bağlı qərarın tezliklə veriləcəyini bildirib. Maduronu həbs etmək üçün hər hansı bir Venesuela rəsmisi ilə hər hansı bir razılaşmanın olub-olmadığı soruşulduqda, Tramp cavab verib: “Əslində, bəli, çünki bir çox insan razılaşma əldə etmək istəyirdi, amma biz bunu bu şəkildə etməyə qərar verdik”. Tramp həmçinin mediada yayılan xəbərlərin əksinə olaraq, müxalifət lideri Maria Corina Machadonun Nobel Sülh Mükafatını alması onun qərarlarına təsir etmədiyini iddia edib. ABŞ prezidenti bildirib ki, onun bazası onun qərarlarını dəstəkləyir və Konqres Venesuelaya qarşı əməliyyatdan xəbərdardır.
Şayəstə
