ABŞ və Türkiyə prezidentləri Donald Tramp və Rəcəb Tayyib Ərdoğan Ankaranın F-35 döyüş təyyarəsi proqramına mümkün qayıdışı ilə bağlı “son on ilin ən məhsuldar danışıqlarını” aparırlar.
Elchi.az xəbər verir ki, bunu ABŞ-ın Türkiyədəki səfiri və ABŞ Prezidentinin Suriya üzrə xüsusi nümayəndəsi Tom Barrak bildirib.
“ABŞ Türkiyə ilə F-35 proqramına mümkün qayıdışı və Rusiyanın S-400 hava hücumundan müdafiə raket sisteminə sahib olması ilə bağlı danışıqlar aparır. ABŞ qanunlarına görə, Türkiyə F-35 proqramında iştirakını bərpa etmək üçün S-400 sisteminin istismarından və sahibliyindən imtina etməlidir. Prezident Tramp və Prezident Ərdoğan arasındakı müsbət münasibətlər yeni, əməkdaşlıq atmosferi yaradıb ki, bu da son on ilin ən məhsuldar müzakirələrinə təkan verir. Ümid edirik ki, qarşıdakı aylarda bu danışıqlar həm ABŞ-ın, həm də Türkiyənin təhlükəsizlik maraqlarına cavab verən irəliləyişli bir həll yoluna gətirib çıxaracaq”, – deyə o, sosial mediada yazıb.
