Azərbaycan və İordaniya arasında hava nəqliyyatı sahəsində əməkdaşlığın genişləndirilməsi müzakirə olunur.
Elchi.az xəbər verir ki, bu barədə Azərbaycan–İordaniya Hökumətlərarası Komissiyasının 4-cü iclasında Komissiyanın Azərbaycan tərəfdən həmsədri, maliyyə naziri Sahil Babayev məlumat verib.
Nazir bildirib ki, son illərdə iki İordaniya aviaşirkəti Azərbaycana çarter reysləri həyata keçirib, lakin bu uçuşların sayı məhdud xarakter daşıyır. Onun sözlərinə görə, Azərbaycan Hava Yolları (AZAL) bu il Əmman istiqamətində yay mövsümündən sonra birbaşa reyslər təşkil edib və gələn il bu uçuşların genişləndirilməsi nəzərdən keçirilir.
Sahil Babayev həmçinin qeyd edib ki, tərəflər çarterdən müntəzəm kommersiya reyslərinə keçidin imkanlarını müzakirə edir. O, turizm axınının artırılması üçün hər iki ölkənin turizm agentliklərinin əməkdaşlığının gücləndirilməsinin vacibliyini vurğulayıb.
