Azərbaycanın xarici işlər naziri Ceyhun Bayramov və onu müşayiət edən nümayəndə heyəti İtaliyaya rəsmi səfər çərçivəsində Neapolda UEFA Çempionlar Liqasının əsas mərhələsinin V turunun oyununda “Napoli” – “Qarabağ” qarşılaşmasını izləyib.
Elchi.az xəbər verir ki, bu barədə Azərbaycan XİN-in X hesabında paylaşım edilib.
“Bu, Azərbaycanın Avropa futbolunda güclü mövqeyini və milli çempionlarımızı beynəlxalq arenada dəstəklədiyini nümayiş etdirən qürurverici an olub”, – paylaşımda vurğulanıb.
C. Bayramov da öz səhifəsində paylaşım edib, “Qarabağ”ın Azərbaycanı Avropada qürurla təmsil etdiyini vurğulayıb.
“Oyun başa çatdıqdan sonra “Qarabağ” FK-nın prezidenti Tahir Gözəl ilə birlikdə futbolçularımızı salamladıq və Avropanın ən güclü klublarından biri olan “Napoli”yə qarşı göstərdikləri qətiyyətli çıxışa görə minnətdarlığımızı bildirdik. Onlara qarşıdakı oyunlarda davamlı uğurlar arzuladım”, – nazir bildirib.
