Koalaların nəsli kəsilmək təhlükəsi ilə üzləşən xlamidiya epidemiyası ilə mübarizə üçün hazırlanmış ilk vaksin Avstraliyada təsdiqlənib. Mütəxəssislər peyvəndin ölüm nisbətini 65 faiz azalda biləcəyini və minlərlə heyvanın həyatını xilas edə biləcəyini söyləyirlər.
Elchi.az xəbər verir ki, Avstraliyanın Sunshine Coast Universitetinin (UniSC) alimləri on ildən artıqdır üzərində işlədikləri peyvəndlə koalalar arasında ölümcül xlamidiya epidemiyasını dayandırmağı hədəfləyirlər. Mütəxəssislər bəzi ərazilərdə yoluxma nisbətinin 70 faizə çatdığını və koloniyaların getdikcə artan məhv olmaq təhlükəsi ilə üzləşdiyini vurğulayırlar.
Mikrobioloq Peter Timms “Bu gün çox həyəcanlı bir gündür” dedi. “Bəzən təslim olmaq ərəfəsində idik, amma bacardıq”.
10 illik sınaq öz nəticəsini verir
Xlamidiya koalalar arasında cütləşmə və ya yaxın təmas yolu ilə ötürülür. Sidik yollarının infeksiyalarına, korluğa və sonsuzluğa səbəb ola bilər və çox vaxt ölümcül olur. Müalicə üçün tətbiq edilən antibiotiklər koalaların yalnız evkalipt yarpaqlarını həzm etməsinə imkan verən bağırsaq bakteriyalarını məhv edə bilər və bu, aclığa səbəb olur.
Peyvənd 10 il ərzində yüzlərlə vəhşi koalada sınaqdan keçirilib. Federal tənzimləyicilər tərəfindən təsdiqlənmiş tədqiqat, peyvəndin ölüm nisbətlərini ən azı 65 faiz azaltdığını və çoxalma mövsümündə xəstəlik əlamətlərini əhəmiyyətli dərəcədə basdırdığını aşkar edib.
Şayəstə Hüseynova
