Fövqəladə Hallar Nazirliyinin Dövlət Yanğından Mühafizə Xidməti Bakı şəhəri, Yasamal rayonu, Nizami küçəsi, 1 ünvanında yerləşən “Nizami Boutique House” çoxmərtəbəli yaşayış binasında “Çoxmərtəbəli binalarda baş verə biləcək yanğınların söndürülməsi və insanların təxliyyəsinin təşkili” mövzusunda yanğın-taktiki təlim keçirib.
Elchi.az FHN-ə istinadən xəbər verir ki, təlimin keçirilməsində əsas məqsəd yüksəkmərtəbəli yaşayış binalarında yanğın baş verdikdə əraziyə cəlb olunan yanğın-xilasetmə qüvvələrinin qarşılıqlı fəaliyyətinin daha da təkmilləşdirilməsi, bu kimi obyektlərdə mümkün yanğınların söndürülməsi və xilasetmə üzrə şəxsi heyətin peşəkar bacarıqlarının gücləndirilməsi, təlim keçirilən müəssisənin personalının yanğınlarla bağlı davranış qaydaları barədə maarifləndirilməsi olub.
Təlim zamanı çoxmərtəbəli yaşayış binasında baş vermiş şərti yanğın yerinə operativ çatan FHN Dövlət Yanğından Mühafizə Xidmətinin yanğından mühafizə bölmələri sakinlərin “təhlükəli ərazidən” təxliyə edilməsi, “yanğın” yerində çevik kəşfiyyatın aparılması və “yanğının söndürülməsi” əməliyyatını yerinə yetiriblər.
Təlimdən sonra əldə edilmiş nəticələr müzakirə olunub, müvafiq tapşırıqlar verilib.
