Dünyadakı buzlaqlar həyəcan təbili çalır. Yeni araşdırmaya görə, qlobal istiləşmə bu gün tamamilə dayansa belə, dünyadakı buzlaqların təxminən 40%-i artıq yox olmağa məhkumdur.
Elchi.az xəbər verir ki, alimlər buzlaqların 2020-ci ilə nisbətən kütləsinin 39%-ni itirəcəyini və bunun qarşısıalınmaz bir proses olduğunu bildiriblər. Bu ərimə dəniz səviyyəsinin təxminən 11 santimetr qalxmasına səbəb olacaq.
Əgər dünya mövcud iqlim siyasəti ilə davam edərsə, bu itki 76%-ə çata bilər. Bu, içməli su, kənd təsərrüfatı və enerji istehsalı üçün buzlaqlardan asılı olan ölkələr üçün fəlakət demək olardı.
Araşdırma “Science” jurnalında dərc olunub. “39% itki ilə 76% itki arasındakı fərq bəşəriyyətin buzlaqların yoxa çıxmasına uyğunlaşa bilib-bilməməsidir”, – buzlaqları tədqiq edən alim və tədqiqatın müəlliflərindən biri Ceyms Kirkham deyib.
“Hər 0,1 dərəcə vacibdir”
Tədqiqata Avstriyanın İnsbruk Universitetindən Lilian Şuster rəhbərlik edib. “Hər 0,1 dərəcə istiləşmə o deməkdir ki, biz 2 faiz daha çox buzlaq itiririk” dedi Şuster. “Biz ümid vermək istəyirik. Qlobal istiləşməni dərəcənin onda biri azaltmaq belə daha çox buzlaqları qoruya bilər.”
Şayəstə Hüseynova
