Bu gün Milli Məclisin İqtisadi siyasət, sənaye və sahibkarlıq komitəsinin iclasında Elman Rüstəmovun Mərkəzi Bankın idarə Heyətinin üzvlüyündən azad edilməsi, Taleh Kazımovun isə Mərkəzi Bankın İdarə Heyətinin üzvü vəzifəsinə təyin edilməsi haqqında Azərbaycan Respublikası Prezidentinin təqdimatları müzakirə edilib.
Hər iki təqdimata müsbət rəy verən İqtisadi siyasət, sənaye və sahibkarlıq komitəsi onları Milli Məclisin Plenar iclasında müzakirə üçün tövsiyə edib.
Elchi.az Mərkəzi Bankın İdarə Heyətinin üzvü vəzifəsinə namizəd olan Taleh Kazımovun dosyesini təqdim edir:
T.Kazımov 11 sentyabr 1983-cü ildə anadan olub.
T.Kazımov Azərbaycan Texniki Universitetinin “Avtomatika və hesablama texnikası” fakültəsinin bakalavr pilləsini bitirib, daha sonra isə Azərbaycan Dövlət Neft Akademiyasında MBA dərəcəsi və Georgia State University-də kommersiya üzrə dərəcə alıb.
Həmçinin, 2013 ildə T.Kazımov London Business School (Böyük Britaniya) və Harvard Business School (ABŞ) məzunu olub.
Peşəkar fəaliyyətə 2001-ci ildən başlayıb. 2004-cü ildən 2006-cı ilədək davam edən dövrdə “Bank Standard” QSC-də müxtəlif vəzifələrdə, o cümlədən Xəzinədarlıq departamentinin aparıcı mütəxəssisi, İdarəetmə uçotu və büdcə planlaşdırılması istiqamətinin rəhbəri, Korporativ kreditləşmə istiqamətinin direktor müavini vəzifələrində işləyib. 09.2006-cı ildən 01.2007-ci ilədək “Ernst & Young” şirkətində auditor vəzifəsini tutub. 01.2007-ci ildən 07.2007-ci ilədək “FinEko” İAA-nın Baş direktoru vəzifəsini tutub.
Taleh Kazımov 07.2007-ci ildən “PAŞA Bank”da Risklərin İdarəedilməsi Departamentinin meneceri vəzifəsində işləməyə başlayıb, 2009-ci ilin avqustundan isə Bankın Xəzinədarlıq Departamentinin direktoru vəzifəsini tutub. Taleh Kazımov 7 dekabr 2011-ci ildən “PAŞA Bank”ın İdarə Heyətinin üzvü seçilib. Hazırda korporativ və biznes-bankinq istiqamətləri, investisiya bloku, ticarət maliyyələşdirməsi, maliyyə institutları və kredit menecmenti sahələri onun kurasiyasındadır.
Son şərhlər